• აბიტურიენტს უფლება აქვს მათემატიკის, ისტორიის, გეოგრაფიის, ქიმიის, ფიზიკის, ბიოლოგიის გამოცდა ჩააბაროს რუსულ ენაზე.
• ზოგადი უნარების გამოცდის ჩაბარება შესაძლებელია რუსულ, სომხურ და აზერბაიჯანულ ენებზე.

ერთიანი ეროვნული გამოცდების საფუძველზე სახელმწიფო სასწავლო გრანტის მოპოვების უფლება აქვს საქართველოს მოქალაქეს.
სახელმწიფო სასწავლო გრანტი არ გაიცემა:
• იმ პირებზე, რომლებსაც ის ერთხელ მიღებული აქვთ უმაღლეს საგანმანათლებლო პროგრამაზე;
• იმ პირებზე, რომელთაც დააგროვეს სახელმწიფო სასწავლო გრანტის მოპოვებისთვის საკმარისი ქულა, მაგრამ ვერ მოიპოვეს 2010 წელს უმაღლეს სასწავლებელში სწავლის უფლება;
• იმ პირებზე, რომელთაც ვერ გადალახეს მინიმალური კომპეტენციის ზღვარი საგამოცდო ბარათში მითითებულ ყველა გამოცდაში.
უცხო ქვეყნის მოქალაქეზე სახელმწიფო სასწავლო გრანტის გაცემა შესაძლებელია სახელმწიფოს მიერ სასწავლო გრანტისთვის გამოყოფილი თანხის წლიური მოცულობის არა უმეტეს 2%-ის ფარგლებში, საქართველოს განათლებისა და მეცნიერების სამინისტროს მიერ განსაზღვრული სპეციალური სახელმწიფო პროგრამით, საერთაშორისო შეთანხმების საფუძველზე, ან ნაცვალგების პრინციპით.

აკადემიურ უმაღლეს საგანმანათლებლო პროგრამებზე სწავლის გაგრძელების მიზნით აბიტურიენტი აბარებს 4 გამოცდას _ აქედან 3 სავალდებულოსა  (ქართული ენა და ლიტერატურა, ზოგადი უნარები, უცხოური ენა) და 1 არჩევითს  _ შემდეგი საგნებიდან: ლიტერატურა, მათემატიკა, ისტორია, გეოგრაფია, ქიმია, ფიზიკა, ბიოლოგია, რომელსაც ფაკულტეტი ითხოვს.

2010 წლიდან ამოქმედდა სპეციალური პროგრამა: აბიტურიენტებს, რომლებიც დარეგისტრირდებიან ამა თუ იმ ფაკულტეტზე სპეციალურად ამ პროგრამისათვის განსაზღვრულ ადგილებზე, მოუწევთ მხოლოდ ერთი გამოცდის – ზოგადი უნარების გამოცდის ჩაბარება  სომხურ ან აზერბაიჯანულ ენაზე. ეს აბიტურიენტები ერთმანეთს გაუწევენ კონკურენციას და ჩარიცხვის შემთხვევაში ისწავლიან 1 წელი (60 კრედიტი) ქართულ ენაში მომზადების საგანმანათლებლო პროგრამაზე. Aამ პროგრამის დასრულების შემდეგ სტუდენტები მიიღებენ ქართულ ენაში მომზადების საგანმანათლებლო პროგრამის დასრულების დამადასტურებელ სერტიფიკატს და თავიანთი არჩევანის შესაბამისად სწავლას გააგრძელებენ უმაღლესი დაწესებულების პროფესიული უმაღლესი (2 ან 3 წელი _ 120-180 კრედიტი), ბაკალავრიატის  (4 წელი _ 240 კრედიტი), დიპლომირებული სტომატოლოგის/ვეტერინარის (5  წელი _ 300 კრედიტი) ან დიპლომირებული მედიკოსის საგანმანათლებლო პროგრამით (6 წელი _ 360 კრედიტი).
ქართულ ენაში მომზადების საგანმანათლებლო პროგრამებთან ერთად აბიტურიენტებს უფლება აქვთ ფაკულტეტების რეიტინგულ ჩამონათვალში მიუთითონ სხვა ფაკულტეტები ან პროფესიული უმაღლესი საგანმანათლებლო პროგრამები. ამ შემთხვევაში აბიტურიენტები აბარებენ ამ ფაკულტეტისთვის/პროგრამისთვის განსაზღვრულ ყველა გამოცდას

2010 წლიდან აკადემიურ უმაღლეს საგანმანათლებლო პროგრამებზე სახელმწიფო სასწავლო გრანტი გაიცემა არა მარტო ზოგადი უნარების, არამედ ყველა გამოცდის (3 სავალდებულო და  ერთ-ერთი არჩევითი საგნის ) შედეგის მიხედვით.

2010 წელს სტუდენტებს, რომლებიც ერთიანი ეროვნული გამოცდების საფუძველზე ჩაირიცხნენ უმაღლეს სასწავლებელში, უფლება აქვთ მონაწილეობა მიიღონ გამოცდების ეროვნული ცენტრის მიერ ორგანიზებულ საგრანტო კონკურსში სახელმწიფო სასწავლო გრანტის მოპოვებისთვის ან გაზრდისთვის.
სტუდენტთა საგრანტო კონკურსში სახელმწიფო სასწავლო გრანტის მოსაპოვებლად სტუდენტმა უნდა ჩააბაროს გამოცდა ზოგად უნარებში ქართულ ან რუსულ ენაზე.
სტუდენტებს უფლება აქვთ მონაწილეობა მიიღონ ერთიან ეროვნულ გამოცდებში და მოიპოვონ სხვა ფაკულტეტზე ან საგანმანათლებლო პროგრამაზე სწავლის გაგრძელების უფლება.